KIA ginra ni hta gasat gala majan matut byin
KIA Dap Ba ( 5 ) Dap Dung ( 3 ) ginra, Nga Gyang kaw January, 12 ya shana daw hkying 1:00pm aten kaw Myen hpyen hpung ni lagaw lam hte htim lung wa ai majaw gasat gala majan byin ai lam chye lu ai.
Law Hpyu kaw dap jung shara jahkrat nga ai Myen hpyen hpung ni hpe January, 11 ya shani hkying 12:00pm kawn hkying 1:00pm aten lapran KIA hpyen hpung ni sa htim gap
ai lam mung chye lu ai.
KIA Dap Ba ( 4 ) Dap Dung ( 8 ) ginra, Kutkai Byuha Loi Seng kawng kaw nga ai Myen hpyen hpung ni January, 11 ya shana daw hkying 4:50pm aten kawn hkying 5:30pm aten laman Man Mau hte Man Pying grup yin de laknak kaba ( 10 ) jan lang gap bang ai lam chye lu ai.
Dap Dung ( 2 )ginra mung Mung Ji Myen Balik kawng kaw du nga ai Myen hpyen dap Tatma ( 99 ) kata na hpyen hpung ni hte KIA hpyen hpung ni January, 10 ya shana daw hkying 6:10pm aten kaw gasat gala majan byin ai hte Myen hpyen hpung ni hkrup mara mare de sinat gap bang ai majaw Mung Ji,Man Bung mare na Jan Lamung Roi Ji lapai lata hte lapai lahput kaw pala hkra hkala mat ai majaw Kutkai tsi rung kaw tsi tsi hkam la nga ai lam mung chye lu ai.
