KIA hpyen hpung hte Myen hpyen dap Hk.L.Y 10 na hpyen hpung ni gasat gala majan byin
Mungmyit Sinli Ga ( Kachin Sub-state ) KIA Dap Ba 6 Dap Dung 9 ginra hta shamu shamawt hkawm nga ai Myen Dapnu 88 kata na Hk.L.Y 10 hpyen n gun 50 daram hte KIA Dap Dung 9 Kung 2 hpyen hpung ni February shata 20 ya dai hpawt hkying 8:10am aten hta gasat gala majan byin ai lam chye lu ai.
Gap hkat ai shara gaw Kuthkai Ginwang, Bumpri Bum Ginwang Daw, Walai Bazung mare shang wa ai lam numshe kaw re. Hkying 8:10am kawn hkying 8:30am aten du hkra re, shanhte lai wa hkyen ai kaw anhte kaw na ni hte manpa sa hkrum hkat mat ai ga re. Nga nna shawng lam na Salang langai tsun dan ai.
Myen hpyen dap a Dap Awn Daju rung kaw nna lai wa sai 2018 ning December shata 21 ya shani hta Sam Mung hte Jinghpaw Mung na ginwang ginjaw shara 5 hta shata 4 tup hpyen shamu shamawt ai lam hpe gan jahkring da na matu ndau shabra laika shapraw lai wa sai re.
Ndau shabra laika shapraw da ai raitim, Myen hpyen dap gaw hpyen shamu shamawt ai hpe jahkring da ai lam n-nga ai sha n-ga shawoi hpyen dap njung ai shara hkan mung hpyen dap ningnan ni jung jat wa ai hpe chye lu ai.
