KIA hpyen hpung hte Myen hpyen hpung ni laja lana majan byin
KIA Dap Nawng Dap Dung ( 255 ) hpyen hpung ni shara jahkrat nga ai Pung Ling Post hpe December 14 ya jahpawt hkying 8:55am aten hta Myen hpyen dap Hk.M.Y ( 388 ) dap ni wa htim gap ai kawn laja lana majan byin ai, hkying 1:16pm aten hta Myen hpyen ni kalang bai wa htim gap ai, dai hpang laknak kaba hte Pungli Post maga de matut gap bun ai lam, shawnglam shisawk ni kawn chye lu ai.
KIA Dap Ba ( 3 ) Dap Dung ( 12 ) ginra hta mung, Myen hpyen dap ni Jet nbungli ( 4 ) hte lahkawng lang dabat nna, Loi Jau Bum, Marit Hkyet, Dung Hkung Hkyet, Udang Bum shara ni de bawm wa jahkrat bun ai.
Dung Hkung Hkyet kaw nbungli bawm langai wa hkrat kapaw ai majaw, mungmasha Num langai bawm hkyep hkra hkala mat ai lam chye lu ai.
Hkying 3:30pm aten kaw na hkying 4:00pm aten du hkra, Man Dat, Gadaw Nhkang Bum, Bang Htan, RCM nawku jawng kawng, Balawng Dingsa shara ni hta nga ai Myen hpyen hpung ni mung, KIA hpyen hpung ni nga ai Marit Hkyet, Loi Jau Bum, Kale Hkyet shara ni de, laknak kaba hte gap sharu bun ai.
KIA Dap Ba ( 2 ) Dap Dung ( 20 ) ginra de, Myen hpyen ni a sinat machyu pala htaw ginlen ya ai mawdaw ( 9 ) hpe KIA Dap Dung ( 20 ) hpyen hpung ni, December 14 ya shana maga hkying 4:00pm aten hta Hkra Yang mare dingsa hte Hpalap Kawng mayan kaw wan nat jahten kau ya ai lam chye lu ai.
December 14 ya shani sha, KIA Dap Ba ( 8 ) Dap Dung ( 26 ) ginra, Loi Mun hte Nam Mate lapran na KIA hpyen hpung ni a Zinghtung Post hpe Hk.L.Y ( 257 ) dap na hpyen n-gun ( 80 ) daram hte wa htim gap ai kawn gasat majan byin ai.
KIO ginjaw grup yin de mung, 120mm ngu maram lu ai laknak kaba hte Hka Ya, Bumre bum kaw nga ai Myen hpyen ni, December 14 ya jahpawt hkying 2:00am aten hta ( 12 ) lang gap bun ai. December 15 ya jahpawt hkying 8:15am aten hta ( 6 ) lang gap bun ai lam na chye lu ai.
