KIA hpyen hpung hte Myen hpyen hpung ni shara lahkawng kaw gasat majan byin
KIA Dap Ba ( 2 ) ginra, Ting Kawk mare shingdu hku shamu shamawt lung wa ai Myen hpyen hpung hte KIA hpyen hpung ni, January 22 ya shana maga hkying 4:48pm aten hta gasat gala majan byin ai lam, shawnglam shisawk ni kawn chye lu ai.
Myen hpyen hpung ni gaw, Ting Kawk mare grup gra de, sinat kaji kaba hkrup mara gap bun ai hta nawku jawng hte laika sharin jawng lapran kaw sinat kaba pala si langai wa hkrat kapaw ai, masha kaw hkra ai lam gaw nnga ai, nga nna Ting Kawk mare na salang langai tsun ai.
Mare masha ni yawng gaw rai baw nna nga taw ai, nkau gaw kaduk ni htu rai maja let nga nga ai. Dai ni mung mare hte loi tsan ai shara hkan sinat nsen naw na ai nga nna, salang wa tsun ai.
KIA Dap Dung ( 14 ) ginra, Nawng Mi mare kawn lung wa ai, Hk.L.Y ( 298 ) dap hte Nawng Mi mare na Pyi Tu Tsit ( P.T.Ts ) pawnghpawm n-gun ( 40 ) daram hte KIA hpyen hpung ni, January 22 ya shana hkying 6:18pm aten hta Ban Kawk Yuzana hte Awng Ra mare lapran kaw gasat majan byin ai.
Mungmyit Sinli Ga ( Kachin Sub-State ) hta mung, KIA Dap Ba ( 4 ) Dap Dung ( 9 ) ginra, Nam Jang mare kaw du nga ai Hk.L.Y ( 13 ) dap na Myen hpyen hpung ni gaw, mungshawa ni a dum nta hkan laja lana sawk jep hkawm nga ai lam, buga masha ni kawn chye lu ai.
