KIA hpyen hpung ni, gumshem Myen hpyen dap hpe sa htim gap gasat
Mungmyit Sinli Ga (Kachin Sub-state), Mungmyit Ginwang, KIA Masat (4) Dap Ba, Masat (34) Dap Dung ginra, Mandung gumshem Myen hpyen dap Hk.L.Y (130) dap hpe, September shata 29 ya jahpawt hkying 7:00am aten daram hta KIA ni sa htim gap gasat ai lam chye lu ai.
Shana maga hkying 2:00pm aten daram hta Mandung Myen Balik Dap hpe mung KIA ni sa htim gap gasat ai hpang, hpyen dap hpe wan nat jahten kau ya ai lam, shawng lam shiga lawk kaw na chye lu ai.
Masat 8 Dap Dung ginra, Pang O hkaraw kaw September shata 28 ya jahpawt hkying 7:16am aten kaw na hkying 8:47am aten du hkra, gumshem Myen hpyen hpung ni hte KIA ni gasat poi byin ai re.
KIA Masat (10) Dap Ba, Masat (2) Dap Dung ginra hta mung, September shata 28 ya shani hta sha, Kunlung maga de hpyen modo (5) hte lung wa ai gumshem Myen hpyen ni hpe KIA ni, Pangti hte Nati lapran kaw hkap gap gasat ai lam chye lu ai.
Ya aten hta Mungmyit Sinli Ga ginra, nkau mi hta gumshem Myen hpyen dap ni hte Balawng (Ta-ang) TNLA ni gaw, KIA ni nga ai shara de shamu shamawt chyinglau hkawm nga ai sha n ga, shawoi hkan shagyit (Gate) nnga ai mare kahtawng hkan du hkra, shagyit (Gate) ni jahkrat tawn ai majaw mungshawa masha ni hkawmsa hkawmwa dut dang yak hkak ai lam ni byin ai lam, buga masha ni tsun ai kaw na chye lu ai.
