KIA hpyen hpung ni gumshem Myen hpyen ni sin ai shagyit (Gate) shara (2) hpe sa htim gap
Mungmyit Sinli Ga (Kachin Sub-state), KIA Masat (4) Dap Ba hte Masat (6) Dap Ba kata na, Masat (9) Dap Dung hte Masat (29) Dap Nawng Dap Dung hpyen hpung ni gaw, September shata praw 6 ya shana hkying 7:00pm aten hta gumshem Myen hpyen ni nga ai shagyit (Gate) shara (2) hpe sa htim gap gasat ai lam chye lu ai.
“Anhte Masat (29) Dap Nawng Dap Dung ni gaw, Sinli Asiaworld Gate kaw mana hkying 7:00pm aten hta sa htim gap ga ai. Masat (9) Dap Dung ni mung, Kutkai Asiaworld Gate kaw sa htim gap ai lam na lu ai. Anhte sa htim gap ga ngu nna jahkrup da ai lam gaw nnga ga ai” nga nna shawng lam na lit nga ai salang langai tsun dan ai.
KIA ni shagyit (Gate) kaw sa gap ai lam hte seng nna, shawng lam na lit nga ai salang langai ndai zawn tsun ai.
“Asiaworld gate ngu gaw hpyen dap hte nseng ai, lam hte seng ai company kaba she re shanhte gaw lam galaw ai majaw hkawn hta sha ai rai nga ai, dai hpe Myen hpyen dap ni gaw, hpyen la da Balik da rai na shanhte a shara zawn rai shara sa la nhtawm, lai wa lai sa mungshawa ni hpe san jep shatsang, gumhpaw hpyi sha ai lam ni galaw ma ai, dai hpe mungshawa ni nra sharawng ai majaw, anhte mung mungshawa ni a manaw nsen hpe madat let, anhte lu galaw ai daram galaw ai lam re” nga nna tsun ai.
Kutkai gumshem Myen hpyen dap ni laknak kaba hkrup mara gap shadam bun ai majaw, Kutkai Mawhik mare kaw sinat kaba si (2) wa hkrat kapaw ai majaw, mungshawa marai (5) hkra hkala hkrum ai lam chye lu ai.
Hkala hkrum ai ni gaw, Jan. Mangshang Sau Wang asak (73) ning, Salang Pyi Phyu Lin asak (33) ning, Hpauyam Seng Hkawn Nan asak (11) ning, Hpauyam Naw San Nan asak (7) ning hte Lamai Brang Htoi Nan asak (3) ning jan ni rai nga ai.
Jan. Mangshang Sau Wang hte Hpauyam Seng Hkawn Nan yan gaw, pala hkyep katset hkra ai madang sha rai nna, nta kaw nga let tsi tsi hkamla nga ai re. Lamai Brang Htoi Nan hte Hpauyam Naw San Nan yan gaw langai mi magyi kaw langai wa gaw lahkap kaw pala hkyep shang mat ai hpe dai hpawt Kutkai tsi rung kaw ga shaw kau ya sai re hte Pyi Phyu Lin hte seng nna gaw hpa nga shiga mung nna ai re lam, Kutkai mare masha langai tsun dan ai.
September shata praw 6 ya jahpawt hkying 10:00am aten daram hta KIA Masat (9) Dap Dung ni nga ai, Kawng Sak Bum maga de gumshem Myen hpyen dap, Hk.L.Y (123) dap ni htu shadut tawt lai shang wa ai majaw, KIA ni hte gasat gala majan byin ai lam mung nga ai.
Dai ni September shata praw 7 ya jahpawt hkying 9:30am aten daram kaw nna, mani gasat poi byin ai shara, Kawng Sak Bum kaw KIA hte gumshem Myen hpyen ni laja lana gasat gala majan matut byin nga ai re.
Gumshem Myen hpyen dap ni kawn gasat gala majan byin ai shara hta, Jet Fighter nbungli (3) hte bawm wa jahkrat, wa gap gasat ai lam galaw nga ai rai nna, mani September shata praw 6 ya shani hta gaw, Helicopter nbungli (1) hte wa gap gasat ai lam chye lu ai.
KIA Masat (6) Dap Ba, Masat (9) Dap Dung ginra, Hku Mung hte Hanggai lapran kaw September shata praw 5 shani hta mung, Munggu maga na yu wa ai, gumshem Myen hpyen modo 14 hpung ni hpe KIA ni hkap gap gasat ai re.
September shata praw 4 ya shani hta sha, KIA Masat (10) Dap Ba, Masat (2) Dap Dung ginra, Punghtun Manpying mare makau kaw gumshem Myen hpyen ni KIA hpyen hpung ni nga ai shara de shamu shamawt chyinglau lu wa ai majaw, gasat poi byin ai lam chye lu ai.
Ya aten Mungmyit Sinli Ga (Kachin Sub-state), KIA Masat (4) Dap Ba, Masat (6) Dap Ba hte Masat (10) Dap Ba ginra ni hta, gumshem Myen hpyen dap hte KIA ni shani shagu ngu na gasat gala majan bai byin nga ai re.
