KIA hpyen hpung ni hte Myen hpyen dap ni matut manoi majan byin
Mungmyit Sinli Ga (Kachin-Sub-State), Kutkai Ginwang, Bumpri Bum Ginwang Daw, Ninglum Ninghtawn, Lai Hpawng kawng kaw shara jahkrat nga ai KIA Dap Ba (6), Dap Dung (9) hpung ni hte Myen hpyen dap Tatma(99) kata na hpyen hpung ni March shata praw 1 ya shani, hkying 10:10am aten kaw nna gasat gala majan byin ai lam shawng lam na salang langai tsun dan ai.
Tatma (99) kata na hpyen hpung ni gaw hpyen n gun 80 daram hte KIA Dap Dung (9) kata na hpyen hpung ni nga ai shara de htu shadut lung wa ai majaw ninghkap gasat ai kaw nna gasat gala majan byin ai re lam chye lu ai.
“Shanhte matut nna naw sa wa jang gaw matut gap na re hte maren anhte mung shara mi kaw sha gap na lam nnga ai, shara htawt sit nna gap na re hte maren, galoi raitim hkrum katut jang gaw grai naw gap hkat ra na re, bai nna langai gaw shanhte maga kaw kade hkala ai nhkala ai nchye lu ai raitim, anhte shara la nga ai shara kaw nna anhte shawng hkap gap lu ai lam re” nga nna shawng lam na salang langai tsun ai.
“Lai wa sai February shata hta mungmyit sinli ga ginra kaw hpyen n gun jat ai lam hte lu sha htaw hpyen mawdaw shalai ai lam hpe ding yang galaw nga ai raitim KIA hpyen hpung ni kaw nna hkap gap ai lam galaw ya ai re majaw shinggan hking hte hpyen mawdaw nre ai mawdaw ni shalai nna mayun mayoi galaw ai lam nga wa ai majaw shiga ni hpe tuphkrak nlu sagawn ai” nga nna matut tsun dan ai.
Mungmyit Sinli Ga (Kachin-Sub-State) ginra hta gasat gala hpyen man majan matut manoi byin nga ai re hte hpyen majan shamu shamawt ai lam mung lahkawng maga shada maja nga ding yang re hpe mung chye lu ai.
