KIA hte Myen hpyen hpung ni gasat gala majan byin
Mungmyit Sinli Ga ( Kachin Sub-state ) KIA Dap Ba 4 Dap Dung 8 ginra, Galeng Ginwang daw Namsum Bum kaw March shata 6 ya shana daw hkying 1:30pm aten hta KIA hpyen hpung ni hte Myen hpyen dap Hk.L.Y 45, Hk.L.Y 242 hte Dapnu 99 na hpawng hpawm hpyen hpung ni gasat gala majan byin ai lam chye lu ai.
Myen hpyen hpung ni, KIA hpyen hpung ni nga ai shara de shamu shamawt htu shadut lung wa ai majaw, hkap shingla gasat dat ai kawn gasat gala majan byin ai re lam, shawng lam na lit nga ai Salang langai EEDY de shana wa ai.
Ya aten hta Myen hpyen dap ni gaw gasat gala majan byin ai shara de hpyen n gun jat nga ding yang re majaw gasat gala majan matut byin wa mai ai nga nna Salang wa tsun ai.
Myen hpyen dap kawn lai wa sai December 21 ya shani hta Sam Mung hte Jinghpaw Mung grup yin na hpyen ginjaw shara 5 kaw shata 4 tup hpyen shamu shamawt ai lam hpe gan jahkring na matu ndau shabra laika shapraw lai wa sai re.
Ndau shabra laika shapraw ngut ai hpang shata mi jan laman hta KIA hpyen hpung ni nga ai shara de Myen hpyen dap ni shamu shamawt lung wa ai majaw 2 lang gasat gala majan byin sai hpe chye lu ai.
