KIA hpyen hpung ni Myen hpyen dap hpe sa htim gap
KIA Dap Ba ( 2 ) hpyen hpung ni, December 30 ya jahpawt hkying 6:45am aten hta Jahtu Zup mare makau kaw dap jung shara jahkrat nga ai, Hk.L.Y ( 297 ) hpyen dap hpe sa htim gap ai kawn gasat majan byin ai lam, shawnglam shisawk ni kawn chye lu ai.
Matut nna hkying 8:20am aten kawn hkying 9:30am aten laman hta mung, Dung ( 11 ) ginra, Gawng Ba Bum Microwave mayan kaw shamu shamawt nga ai Hk.L.Y ( 252, 256 ) pawng hpawm hpyen hpung ni hpe KIA hpyen hpung ni sa htim gap ai.
Pyi Tu Tsit hpyen hpung hte Jawang maga na lung wa ai Myen hpyen hpung ni gaw, Jahtu hka hku hte Hkawng Law grup gra de, sinat kaji kaba gap sharu ai bun ai hta Jahtu Zup mare kata kaw laknak kaba si lahkawng wa hkrat kapaw ai.
Masha hta hkra hkala ai lam gaw nnga ai raitim, mungshawa ni grai hkrit kajawng nga ai, mare masha ni gaw KBC nawku jawng wang hte RCM nawku jawng wang ni hta gan hprawng yen nga ga ai, nga nna buga na salang langai tsun ai.
KIA Dap Ba ( 3 ) Dap Dung ( 27 ) ginra, Loi Jau Bum Muk Wa makau kaw mung, Myen hpyen hpung hte KIA hpyen hpung ni gasat poi byin ai lam matut chye lu ai.
