KIA hte gumshem Myen hpyen dap lahkawng maga laknak kaba gap bun hkat
Ginjaw Ginra rai nga ai Laiza makau grup yin hta KIA hte gumshem Myen hpyen dap ni December shata 16 ya jahpawt hkying 9:00am aten daram kaw na, KIA hte gumshem Myen hpyen dap ni lahkawng maga laknak kaba gap bun hkat nga ai lam chye lu ai.
Bumre Bum, Hka Ya Bum kaw dap jung nga ai, gumshem Myen hpyen dap ni shawng KIA ni dap jung shara jakrat nga ai maga de, laknak kaba gap bun ai majaw, KIA maga na bai nhtang gap bun ai re lam lit nga ai salang langai tsun ai.
Hka Ya Bum makau grup yin hta chyat rawng nga ai, gumshem Myen hpyenla ni hpe malu masha hte laknak arung arai ni lu sa jaw na matu, laknak kaba gap shadam bun nga ai hta KIA hte gumshem Myen hpyen dap lahkawng maga gap gasat hkat nga ai re lam chye lu ai.
Matut nna Daw Hpum Yang kaw dap jung nga ai gumshem Myen hpyen dap ni, Nam San Yang hpyen man maga de dai hpawt hkying 8:00am aten daram kaw na, hpyen modo hte hpyen n-gun htaw jat nga ding yang re lam ginra masha langai tsun ai.
December shata 15 ya shani hta mung, gumshem Myen hpyen dap ni, Ginjaw Ginra rai nga ai Laiza makau grup yin hte Mai Ja Yang muklum kata laknak kaba hkrup mara gap shadam bun ai lam ni nga ai re.
