KIA hte gumshem Myen hpyen dap ni gasat gala byin

KIA Masat (3) Dap Ba ginra, Sin Gawn Mare makau kaw March shata praw 4 ya jahpawt hkying 6:20am aten hta gumshem Myen hpyen dap ni hte KIA ni gasat poi byin ai lam chye lu ai.

Gasat poi byin ai hta Hpu Ta Awng maga kawn rawt wa ai HK.L.Y (78,83) dap pawng hpawm Tai n-gun (150) jan gaw, Sin Gawn Mare makau kaw du hkring nga ai ten hta KIA ni laknak kaba 6 lang sa gap bun ai hta gumshem Myen hpyen dap ni sinat kaji kaba bai nhtang gap bun nna, Sin Gawn Mare makau na mungshawa nta 1 hpe jahpawt hkying 8:30am aten kaw, wan nat jahten kau ya ai lam chye lu ai.

KIA Masat (8) Dap Ba ginra, Shwi Gu kawn Chyauk Ji, Sang Hpaw Daru kaw du nga ai HK.L.Y (77) dap na Tai n-gun (40) daram hpe mung March shata praw 3 ya shana 9:11pm aten hta KIA ni sa wang gap ai kawn gasat poi byin ai lam chye lu ai.