KIA hte gumshem Myen hpyen dap ni gasat gala majan byin nga ai majaw, hpyen koi yen ai mungshawa law wa
Gumshem Myen hpyen dap ni dap jung shara jahkrat nga ai hpyen dap ni hpe KIA ni sa htim gasat nga ai majaw, hpyen dap hte ni nawn ai mare kaw na mungshawa ni hpyen koi yen nga ai hpe chye lu ai.
Uru Seng Maw Hpakant ginra ni hta dap jung nga ai gumshem Myen hpyen dap ni hpe KIA ni January shata praw maga kaw na sa htim gasat nga ai hta Nyawng Pin mare gumshem Myen hpyen dap Hk.L.Y (42) dap hte Gwi Hka mare gumshem Myen hpyen dap Hk.M.Y (120) dap hpe KIA ni sa htim gasat ai majaw, dai mare hkan na mungshawa ni hpyen koi yen nga ai lam, lit nga ai salang ni kaw na chye lu ai.
Gasat gala majan a majaw Gwi Hka mare na mungshawa htinggaw (1000) jan, Hka Chyang mare na hpungkyi jawng hte hpaji jawng ni hta hpyen koi yen nga ai rai nna, mungshawa nkau Deng 6 mare de htinggaw (20) jan hpyen koi yen nga ai lam chye lu ai.
Ndai zawn KIA hte gumshem Myen hpyen dap ni hpyen masa shaja hkat nga ding yang re ai majaw, hpyen koi yen ai mungshawa law wa ai rai nna, gasat gala majan mung matut manoi byin wa mai ai lam chye lu ai.
