KIA hte gumshem Myen hpyen dap ni gasat gala majan laja lana byin
KIA Masat (5) Dap Ba, Masat (3) Dap Dung ginra hta June shata 28 ya jahpawt hkying 6:10am aten hta Hkri Tu Bum makau kaw du nga ai gumshem Myen hpyen dap ni hpe KIA hpyen hpung ni sa htim gap ai kawn gasat poi byin ai lam chye lu ai.
Nwan Yang mare, Hka Htung Kawng shara kaw du nga ai gumshem Myen dap ni gaw, KIA hpyen hpung ni nga ai maga de sinat kaba hte gap bun ai majaw, KIA hpyen hpung ni mung sinat kaba hte bai nhtang gap ai lam, shawng lam shisawk ni kaw na chye lu ai.
Gumshem Myen hpyen dap hte Shwe Min woi awn ai Pyi Tu Tsit pawng hpawm hpyen hpung ni, ndai shata kaw nna KIA Masat (3) Dap Dung ginra de shamu shamawt chyinglau shang wa ai majaw, hpyen masa shaja hkat nga ai sha n-ga gasat poi mung chyahkring hkring bai byin nga ai re.
June shata 27 ya shani hta mung, KIA Masat (6) Dap Ba, Masat (9) Dap Dung ginra hta Kuthkai Asiaworld Gate kaw nga ai gumshem Myen dap ni gaw, KIA hpyen hpung ni nga ai maga de sinat kaba 3 lang gap bun ai lam nga ai.
KIA Masat (9) Dap Ba, Masat (26) Dap Dung gina hta mung, KIA hpyen hpung ni nga ai Pan Che mare maga de, Pyi Tu Tsit ni shamu shamawt pru wa ai majaw, KIA hpung ni hkap gap ai hta Pyi Tu Tsit maga marai (2) hkala sawng ai lam, shawng lam shiga lawk kaw na chye lu ai.
