KIA hte Gumshem Myen Hpyen Dap ni gasat gala majan matut byin
KIA Masat (5) Dap Ba npu, Masat (3) Dap Dung ginra, Gaw Set Yang mare, Sadung, Chihpwi lam numshe kaw shara jahkrat nga ai Gumshem Myen hpyen hpung ni hpe June shata 11 ya jahpawt hkying 6:55am-7:10am aten laman KIA Dap Dung (3) hpyen hpung ni sa gap gasat ai kawn gasat gala majan byin ai lam chye lu ai.
Masat (19) Dap Dung ginra hta gaw, June shata 11 ya jahpawt hkying 7:10am aten Pan Tsun maga de shamu shamawt hkawm nga ai Daw Hpum Yang Hk.L.Y (142) dap na hpyen n-gun (150) daram hpung ni hpe Daw Hpum Yang hte Pan Tsun Post lapran kaw KIA hpyen hpung ni hkap gap gasat ai.
Hk.L.Y (142) dap kaw nna jahpawt hkying 7:53am aten hta Daw Hpum Yang mare maga de 60mm (2) lang gap bun ai rai nna, shana maga hkying 2:35pm-2:45pm aten laman hta mung, Hpun Pyen Bum kaw dap jung nga ai Gumshem Myen Hpyen Dap kawn KIA Masat (19) Dap Dung ginra hte Masat (24) Dap Dung ginra de 81mm (3) lang gap bun ai lam, shawng lam lit nga ai salang ni kaw na chye lu ai.
KIA Masat (9) Dap Ba, Masat (26) Dap Dung ginra hta mung, June shata 11 ya jahpawt hkying 9:30am aten Katsen Bum kawn pru wa ai Hk.M.Y (119) dap na hpyen n-gun (30) daram htaw Mawdaw (2) hpe Katsen Bum hte Ta Mahkan lapran kaw KIA Dap Dung (26) Mungshawa hpyen hpung ni bawm hte hkap gasat ai lam na chye lu ai.
Ya aten Jinghpaw Mung, Mungmyit Sinli Ga (Kachin Sub-state) ginra ni hta Gumshem Myen Hpyen Dap ni kawn KIA ni nga ai ginra de hpyen n-gun, laknak arung arai ni htaw shalai sa jat nga ding yang re majaw, KIA hpyen hpung ni hte gasat gala majan matut manoi naw byin nga ding yang re.
