KIA hte gumshem Myen hpyen dap ni gasat gala majan matut byin
KIA Masat 8 Dap Ba, Masat (5) Dap Dung ginra, Mung Nyang Ginwang hta December shata 26 ya shani hkying 11:30am aten, KIA hte gumshem Myen hpyen dap ni gasat gala majan byin ai lam chye lu ai.
Dai gumshem Myen hpyen dap ni gaw Hk.L.Y (15) dap na hpyen hpung ni rai nna, Ttan Tapin mare, lup wa kawng hte Kumba Ban sun lapran hta gasat gala majan byin ai re lam lit nga ai salang ni kaw na chye lu ai.
Matut nna KIA Masat (3) Dap Ba rai nga ai, Masat (15) Dap Dung ginra hta mung, December shata 26 ya shani hkying 7:30am aten laman, Law Dan kyu hpyi bum kaw nga ai gumshem Myen hpyen dap ni modo lam kaw hkap nga nna, Nmawk maga na lung wa ai mung shawa modo kaji, kaba ni hpe shat mai gumhpraw hkap hpyi hta la nga ai lam chye lu ai.
Ya aten hta KIA ni dap jung shara jahkrat nga ai Dap Ba, Dap Dung ginra ni hta matut manoi ngu na daram, gumshem Myen hpyen dap hte KIA ni gasat gala majan byin nga ai rai nna, December shata kawn MNDAA hte gumshem Myen hpyen dap ni laja lana gasat gala majan ni matut manoi byin nga ai re.
