KIA hte Gumshem Myen hpyen dap ni gasat poi laja lana matut byin
KIA Masat (2) Dap Ba, Masat (14) Dap Dung ginra hta hpyen shamu shamawt hkawm nga ai Gumshem Myen hpyen dap ni hte KIA hpyen hpung ni August shata 24 ya shani hkying 10:15am aten kaw nna hkying 11:00am aten du hkra Chyahkyi Chyu Kawng kaw laja lana gasat poi byin ai lam chye lu ai.
“Tsan Lun hka daru kaw na hpyen shamu shamawt lung wa ai Hk.L.Y (318) dap na pawnghpawm Gumshem Myen hpyen n-gun (60) jan hpung ni hpe Chyahkyi Ju Kawng mayan kaw KIA Dap Dung (14) ni hkap gap gasat ai. Myen hpyen maga si hkala ai lam law ai re” nga nna shawng lam na lit nga ai salang langai tsun ai.
Dai na maga hkying 2:00pm aten hta mung, Mungmyit Sinli Ga, Dung Aw Hkyet kaw Kokang MNDAA ni hte dai mayan shamu shamawt hkawm nga ai Gumshem Myen hpyen dap ni gasat poi byin ai re lam, dai ginra na salang langai shana wa ai.
Mungmyit Sinli Ga Kutkai, Lashu lam mayan hta mung, August shata 24 ya shani hta Gumshem Myen hpyen dap kawn Ambulance Modo ni hte hpyen n-gun htaw shalai nga ai lam, buga masha ni shana wa ai kaw na chye lu ai.
