KIA hte gumshem Myen hpyen hpung ni ang katut gasat majan byin

KIA Masat (1) Dap Ba, Masat (7) Dap Dung ginra hta March shata praw 1 ya jahpawt hkying 9:00am aten KIA ni hte gumshem Myen hpyen hpung ni Sumpyi Yang hte Wa Dat Ga lapran kaw ang katut gasat gala majan byin ai lam chye lu ai.

Gasat gala majan byin nga ai ten, Myitkyina kawn lung wa ai Jet nbung li (2), gasat gala majan byin ai shara hte Sumpyi Yang KIA ni nga ai post de sinat hte wa gap, bawm wa jahkrat bun ai lam chye lu ai.

KIA Masat (3) Dap Ba, Masat (27) Dap Dung ginra rai nga ai Man Wun maga de mung March praw 1 ya jahpawt hkying 7:12am laman Balawng Dingsa kaw dap jung nga ai gumshem Myen hpyen dap kaw nna, 81mm hte (2) lang gap bun ai rai nna, Manje Myen balik dap kaw sin nga ai gumshem Myen hpyen ni mung hkying 9:00pm aten laman sinat kaji gap shangoi ai lam nga ai hpe ginra salang langai tsun dan ai.

Ndai zawn gumshem Myen hpyen dap ni hte KIA ni gasat gala majan byin ai gaw February shata praw kaw na matut manoi byin nga sai re lam chye lu ai.