KIA hte Gumshem Myen hpyen hpung ni gasat gala majan matut byin
KIA Masat (15) Dap Dung ginra, Hpakawn kawn lung wa ai Myen hpyen hpung ni hpe Man Da Bum hte Hpakawn Bum lapran kaw May shata 13 ya shani hkying 11:39am aten KIA Masat (3) Dap Ba hpyen hpung ni hkap gap ai kawn gasat gala majan byin ai lam chye lu ai.
Jahpawt hkying 11:00am aten hta sha, KIA Masat (39) Dap Dung ginra, Nam Ba Hkyi kawn lagaw lam pru wa ai Myen hpyen hpung ni hte KIA Masat (39) Dap Dung hpyen hpung ni Nam Ba Hkyi makau kaw gasat gala majan byin ai.
KIA Masat (10) Dap Ba ginra hta mung, May shata 13 ya jahpawt hkying 9:00am-3:30pm aten laman, Dapnu (99) kata na Myen hpyen hpung ni n-gun (150) daram hte MNDAA hpyen hpung ni Loi Jawng Bum kaw gasat gala majan byin ai rai nna, dai shara de Myen hpyen ni kawn Helicopter (2) hte bawm wa jahkrat, wa gap gasat ai lam chye lu ai.
Gasat gala majan byin ai KIA Masat (15) Dap Dung ginra, Man Da Bum grup yin hta May shata 13 ya shana hkying 7:25pm aten Myen hpyen ni Jet Fighter hte bawm wa jahkrat ai rai nna, shani hkying 12:02pm aten hta mung, Nmawk Hk.M.Y (437) dap kawn Myen hpyen ni Gau Ri Krung maga de 122mm gap bun ai lam na chye lu ai.
