KIA hte Myen hpyen dap ni gasat gala majan matut byin
Mungmyit Sinli Ga ( Kachin Sub-state ) KIA Dap Ba 6 Dap Dung 36 ginra, Mungbaw Howa Man Kawng mare ntsa Yihku bum kaw Myen Dapnu 99 na hpyen hpung hte KIA hpyen hpung ni April shata 20 ya jahpawt 7:30am aten kaw nna gasat gala majan byin ai lam na chye lu ai.
Myen hpyen hpung ni gaw Mai Hpang mare kawn majan byin ai Yihku bum maga de sinat kaba hte gap bun nga ai re. Howa Man Kawng mare na mungshawa ni mung majan byin nga ai Man Pying mare nawku jawng kaw gan yen nga ai lam, buga masha langai shana wa ai kawn chye lu ai.
April 18 ya shani hta mung, Myen Dapnu 99 kata na Hk.M.Y 418 dap ni hte KIA Dap Dung 9 Kung 4 hpyen hpung ni Dima mare lahta Gadung Kawng kaw laja lana gap hkat ai re.
Ndai laman hta Myen hpyen dap ni gaw hpyen modo 100 kaw malu masha machyu pala hte hpyen la hpring hpring htaw nna KIA Dap Ba 3 Dap Dung 1, 12, 27 ginra de wa htaw sa nga ai lam, ginra shi sawk ni shana wa ai kawn chye lu ai.
