KIA hte Myen Hpyen Dap ni gasat gala majan matut byin
KIA Masat (5) Dap Ba, KIA ni dap jung shara jahkrat nga ai Salawng Kawng (Tower shadaw) de Hk.M.Y (387) Myen hpyen hpung ni htu shadut lung wa ai majaw April shata 24 ya jahpawt hkying 9:40am aten hta gasat gala majan byin ai rai nna, dai shara de Hk.M.Y (320) dap ni kawn 60mm, 81mm, 120mm ni hte gap garum ai re lam na chye lu ai.
April shata 24 ya jahpawt hkying 6:30 aten daram kaw nna shana maga aten du hkra KIA Masat (5) Dap Ba, Alaw Bum lagaw mayan Myo Tit mare kaw Alaw Bum lagaw Shan Htung bum hte Mawdaw lam mayan shamu shamawt hkawm lung wa ai Myen hpyen hpung ni hpe KIA hpyen hpung ni hkap shingla gasat ai kaw na gasat gala majan byin ai lam chye lu ai.
Gasat poi byin ai ten, Daw Hpum Yang, Myu Tit Kung Law kaw dap jung shara jahkrat nga ai Myen Hpyen Dap ni kawn 120mm, 140mm ni hte gap ai lam nga ai sha n ga, Myen hpyen nbungli hte sa gap garum ai lam nga ai re hpe chye lu ai.
April shata 23 ya shani hkying 1:00pm-2:22pm aten laman hta mung, Man Dung kawn pru wa ai Myen hpyen hpung ni hpe KIA Dung (34) hpyen hpung ni Man Dung mare makau Maw Lung hte Maw Noi lapran kaw bawm hte hkap gap gasat ai kawn gasat gala majan byin ai lam na chye lu ai.
Shani hkying 12:00pm aten daram hta sha KIA Masat (9) Dap Dung ginra, Htam Hpa Bum kaw MNDAA hte Dapnu (99) kata na Myen hpyen hpung ni gasat gala majan byin ai hta, Myen hpyen ni gaw Namhpaka kawn gasat gala majan byin ai shara de 105mm (12) lang gap bun ai, Helicopter (2) hte wa gap bun ai lam na chye lu ai.
