KIA hte Myen Hpyen Dap ni gasat gala majan matut manoi byin
Mungmyit Sinli Ga (Kachin Sub-state) KIA Masat (6) Dap Ba, Masat (36) Dap Dung ginra, Hpa Hpyit hte Namtau mare lapran, Balawng Kawng dingsa makau kaw March shata 9 ya jahpawt 9:14 aten hta, KIA Masat (36) Dap Dung hpyen hpung ni hte Myen Hpyen Dap, Hk.L.Y (287) hpyen n-gun 100 daram hte gasat gala majan byin ai lam na chye lu ai.
Myen Hpyen Dap ni gaw, KIA hpyen hpung ni nga ai makau grup yin hkan hpyen shamu shamawt ai lam dingyang galaw hkawm ai majaw, gasat gala majan matut manoi byin wa ai re lam, shawng lam shisawk ni tsun ai.
March shata praw 8 ya jahpawt hkying 8:30am aten hta mung, Dima hte Nam-um mare lapran kaw KIA Masat (9) Dap Dung hpyen hpung ni hte Dima maga kaw na pru wa ai Myen Hpyen Dap, Dapnu (99) kata na hpyen hpung ni gasat gala majan byin ai.
Myen Hpyen Dap maga hkra machyi ai lam nga ai majaw, Sun-ung ntsa kaw na Nam-um mare masha ni a Kumshu sun Eka 5 daram wan nat jahten kau ya ai rai nna, dai Kumshu sun gaw Miwa gumhpraw Mun 3 daram manu nga ai re lam, buga masha ni tsun ai.
Myen Hpyen Dap ni gaw gasat gala majan byin ai mare makau grup yin hkan sinat hkrup mara gap bun ai lam, hpyen shamu shamawt ai lam dingyang galaw nga ai majaw, mung mare masha ni hkawm wa hkawm sa, galaw lu galaw sha yak hkak hkrum nga ai sha n-ga, gasat gala byin ai makau grup yin hkan hpyen shamu shamawt ai lam dingyang naw galaw nga ai majaw, majan matut manoi naw byin wa mai ai lam, shawng lam shisawk ni tsun ai kaw na chye lu ai.
