KIA hte Myen Hpyen Dap ni gasat poi matut manoi byin
Mungmyit Sinli Ga (Kachin Sub-state) KIA Masat (10) Dap Ba, Masat (17) Dap Dung ginra, Bang Shau hte Mung Yaw lam lapran Bang Hka mare makau kaw March shata 26 ya jahpawt 10:10am aten hta, KIA hte Myen Hpyen Dap ni gasat poi byin ai lam na chye lu ai.
“Ja Yang Bang Shau grup yin kaw shamu shamawt nga ai dap mying tup hkrak nchye lu ai Myen Hpyen Dap pawnghpawm hpyen hpung ni Mawdaw hte rau Mung Yaw de yu wa ai lam lapran kaw KIA Masat (17) Dap Dung hpyen hpung ni hkap gap ai re” nga nna shawng lam na lit nga ai salang langai tsun ai.
Ya aten Mungmyit Sinli Ga ginra hta, Myen Hpyen Dap kaw nna KIA ni dap jung shara la nga ai makau grupyin hkan hpyen shamu shamawt lam dingyang galaw nga ai lam chye lu ai.
March shata 25 ya shani hkying 1:27pm aten hta, Hpaga Kawng (Daw Zami Company wang) kaw shara jahkrat nga ai Myen Hpyen Dap Hk.M.Y (387) hpyen hpung ni hpe KIA Masat (2) Dap Nawng Daju hpyen hpung ni sa htim gap ai kawn gasat poi byin ai lam nga ai.
March shata 26 ya shani hkying 2:00pm aten hta mung, March shata 24 ya shana KIA hte Myen Hpyen Dap ni gasat poi byin ai makau grupyin KIA ni nga ai ngu shadu ai shara hkan Myen Hpyen Dap kaw nna hpyen nbung li (2) hte wa gap ai re lam, shawng lam shisawk ni shana wa ai kaw na chye lu ai.
