KIA hte Myen Hpyen Dap ni gasat poi matut manoi byin nga

KIA Masat (6) Dap Ba, Masat (9) Dap Dung ginra, Kutkai Ginwang, Ja Bum Ginwang Daw, Dima Ninghtawn, Dima mare makau Nawng Chu Bum de Myen hpyen hpung ni matut manoi htu shadut lung wa ai majaw, KIA hte Myen Hpyen Dap, Dapnu (99) kata na hpyen hpung ni February 22 ya jahpawt hkying 8:30am aten kaw nna ya aten du hkra gasat poi matut manoi byin nga ai lam na chye lu ai.

Myen hpyen hpung ni gaw, Dak Nai, Kutkai hte Namhpaka mare maga kaw nna hpyen n-gun 300 daram htu shadut shamu shamawt shang wa ai re sha n-ga, Dima mare baw kaw nna laknak kaba ni hte hkrup mara gap bun nga ai lam, shawng lam na salang langai tsun ai.

Ya aten Myen Hpyen Dap gaw Mungdan a daru magam ahkang aya hpe gumshem ai lai ladat hte magra jum tek kau ai re sha n-ga, KIA ni dap jung shara jahkrat da ai ginra de nhkring nsa htu shadut lung wa ai majaw, Myen Hpyen Dap hte KIA hpyen hpung ni February shata 20 ya shani kaw nna 21, 22 ya shani du hkra gasat poi matut manoi naw byin nga ai re.