KIA hte Myen hpyen hpung ni gasat gala byin

KIA Dap Ba 9 Dap Dung 44 ginra, Ka-Mai Ginwang, Lawa Pa Mada Bung kaw nga ai Hk.M.Y 111 dap hte Nam Ya kaw nga ai Hk.L.Y 297 dap na pawng hpawng hpyen n-gun 80 daram hte KIA hpyen hpung ni December shata 3, bat hpang 1 ya shani hkying 1:00pm aten kawn hkying 4:40pm aten du hkra Gwihtun Bum kaw gasat gala majan byin ai lam chye lu ai.

Myen hpyen hpung ni gaw hkying 1:00pm aten daram kaw KIA hpyen hpung ni shara la nga ai Gwihtun Bum maga de, laknak kaba 10 lang jan shawng gap bun nna lagaw lam hku bai htu lung wa ai majaw gasat gala majan byin ai re lam, shawng lam na salang langai tsun dan ai.

Gasat majan byin ngut ai hpang, Myen hpyen hpung ni gaw n-gun 30 daram hte Kap Maw Zup maga hku nna n-gun jat lung wa ai lam, salang wa matut tsun ai kawn chye lu ai.