KIA hte Myen hpyen hpung ni gasat gala majan byin
Mungmyit Sinli Ga (Kachin Sub-state) KIA Dap Ba 10, Dap Nawng Dap Dung 37 hpyen hpung ni hte Myen Hpyen Dap, Dapnu 99 kata na hpyen hpung ni February shata 22 ya shani hkying 11:55am aten hta Hu Bung hte Man Pying mare lapran na Mankawng nawng kaw gasat gala majan byin ai lam chye lu ai.
Myen Hpyen Dap ni gaw, KIA Dap Ba 10 hte Dap Dung 37 hpyen hpung ni shara la nga ai Mankawng nawng de shamu shamawt shang wa ai majaw, gasat poi byin ai re lam, shawng lam na Salang langai tsun dan ai kaw na chye lu ai.
February shata 19 ya shani hta mung, KIA Dap Ba 10, Dap Dung 2 ginra, Manlau Makawk Pa mare makau kaw KIA hpyen hpung ni hte Myen hpyen hpung ni gasat gala majan byin ai re.
Ya aten KIA Dap Ba 10 ginra hta Myen Hpyen Dap ni gaw hpyen n-gun 300 daram hte shamu shamawt hkawm nga ai rai nna, KIA ni nga ai shara de ni kahtep wa yang gasat gala majan matut byin wa mai ai lam ginra shisawk ni kawn chye lu ai.
