KIA hte Myen hpyen hpung ni gasat gala majan byin

Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 36 ) ginra, Nam Hkawng mare ntsa Udang bum makau kaw KIA Kung ( 2 ) hpyen hpung hte Myen hpyen dap Hk.M.Y ( 219 ) hpyen hpung ni, November praw 1 ya jahpawt hkying 6:00am aten hta gasat gala majan byin ai lam, hpyen shisawk ni kawn chye lu ai.

Mai Hpang mare kaw nga ai Myen hpyen hpung ni mung, Udang bum maga de laknak kaba 120mm gap ya nna, gasat majan byin ai shara de hpyen garum n-gun jat nga ding yang re lam chye lu ai.

KIA Dap Ba ( 3 ) Dap Dung ( 12 ) ginra, Bang Htan hkalup hpung nawku jawng hte Masat Shadaw Kawng lapran kaw, November praw 1 ya shani hkying 1:50pm aten hta Myen hpyen hpung ni, bawm ( 2 ) kabye kapaw la ai majaw hkying 2:00pm aten hta Myen hpyen dap ni sinat kaji kaba hte hkrup mara gap bun wa ai, dai hpang KIA hpyen hpung ni mung, laknak kaba hte bai nhtang gap bun ai lam nga ai hpe, shawnglam shisawk ni kawn chye lu ai.