KIA hte Myen hpyen hpung ni gasat gala majan matut byin
Mungmyit Sinli Ga (Kachin Sub-state) Munggu Ginwang, KIA Dap Ba 6, Dap Dung 36 ginra, Huwa bum kaw September shata 15 ya jahpawt KIA hte Myen hpyen dap, Dapnu 88 kata na n gun 70 daram, numdaw lahkawng lang gasat gala majan matut byin ai na chye lu ai.
“Anhte kaw na ni ginra gawan sa ai ten, dai hpawt hkying 9:10am hta kalang hkying 9:45am hta kalang numdaw lahkawng lang gap hkat ai hpang Myen hpyen hpung ni gaw bai htingnut mat nna, Man Pying mare kaw wa hkring nga ma ai” nga nna shawng lam na salang langai tsun ai.
Matut nna, KIA Dap Dung 36, Kung 5 ni shara la nga ai Hpai Kawng mare ntsa nlung dabang kaw mung Myen hpyen Dapnu 99 kata na n gun 60 daram htu shadut lung wa ai majaw hkying 1:15pm aten hta gasat gala majan byin ai lam, ginra shi shawk ni kaw na chye lu ai.
Ya na zawn sinat nsen bai ngoi wa ai majaw, mare masha ni hkrit kajawng nna, Hpai Kawng mare makau na hpyen yen dabang de arung arai ni gun htawk nga ai lam, buga masha ni shana wa ai.
September shata 11 ya shani kaw nna, KIA Dap Dung 36 ginra de, Myen hpyen hpung ni shamu shamawt htu lung wa ai majaw shani shagu ngu na gasat gala majan bai byin nga ai re.
