KIA hte Myen hpyen hpung ni shani shagu ngu na gasat gala majan byin nga
KIA Dap Ba ( 2 ) ginra hta shamu shamawt nga ai Dapnu ( 101 ) kata na Myen hpyen hpung hte KIA hpyen hpung ni, December 10 ya jahpawt manap hkying 4:35am aten Nam Hpyek mare makau kaw gasat majan byin ai lam, shawnglam shisawk ni kawn chye lu ai.
Hkying 8:35am aten hta mung, Deng ( 5 ) hpyen dap maga na yu wa ai Myen hpyen hpung hte KIA hpyen hpung ni, Nam Hkang mahkai lai, Lagang Pa sa ai lam numbraw kaw, gasat majan byin ai.
Mungmyit Sinli Ga ( Kachin Sub-State ) KIA Dap Ba ( 6 ) Dap Dung ( 2 ) ginra, Pin Lung maga kaw na lung wa ai Myen hpyen n-gun ( 50 ) daram hpe, KIA Dap Dung ( 2 ) hte Dap Dung ( 37 ) pawng hpawm hpyen hpung ni, Deceber 10 ya shana daw hkying 2:05pm aten hta Man Je hte Da Git lapran kaw gasat majan byin ai lam chye lu ai.
December praw 9 ya shani hta KIA Dap Ba ( 3 ) Dap Dung ( 27 ) ginra, Balawng Ding Sa kaw nga ai Hk.L.Y ( 236 ) dap na, Dap Up Myu Myint Oo gaw, Man Wing lawk ( 1 ) kaw nga ai Hpung Up Lahpai Zau Lat ( Bang Gaw Buga Hpung Up ) hpe phone matut mahkai shana wa ai lam nga ai.
Dai Myen hpyen du wa shana wa ai hta, majan a majaw hpyen yen mat ai Bawng Gaw mare, Balawng Dingsa mare, Kahtan Kawng mare, Man Chyam mare na mungshawa ni gaw, tinang a dum nta de Yi, Sun wa gawan du nga ai ni hpe lawan shaga la na matu tsun ai lam chye lu ai.
Myen hpyen dap ni gaw, ya aten hpyen n-gun law law hte KIA ni nga ai shara shagu ngu na de, shamu shamawt nga ai majaw, majan kaba bai byin wa na hpe buba masha ni hkrit tsang nga ma ai lam, ginra shisawk ni shana wa ai kawn chye lu ai.
