KIA hte Myen hpyen hpung ni shara shagu gasat gala majan matut byin
Ginjaw Ginra Ginwang Ginjaw, Num Lang kawn Shang Htung Bum maga de htu shadut lung wa ai Myen hpyen hpung ni hte KIA hpyen hpung ni Shang Htung Bum lawu kaw May shata 10 ya shana daw hkying 4:15pm aten gasat gala majan byin ai lam chye lu ai.
KIA Masat (9) Dap Ba, Masat (44) Dap Dung ginra ni hta jahpawt hkying 8:44am aten hta Kamaing Byuha Kawng kawn Si En hkauna pa maga de Myen Hpyen Dap ni laknak kaba gap bun ai lam nga ai.
KIA Masat (3) Dap Ba, Masat (12) Dap Dung ginra hta mung, May shata 9 ya shana maga hkying 2:00pm aten Zin Bung lahta kaw Shwe Gu maga kawn lung wa ai Myen hpyen la ni hte arung arai htaw Jak Li (1) hpe KIA ni hkap gap gasat ai lam chye lu ai.
May shata 8 ya shani hkying 12:30pm aten laman hta KIA Masat (4) Dap Ba, Masat (34) Dap Dung ginra, Ye Bung kaw du nga ai Dapnu (101) kata na hpyen n-gun (40) daram hpyen hpung ni hpe KIA ni sa htim gap gasat ai. Shana hkying 6:00-6:30pm aten laman hta sha Nyawng Htawk kawn pru wa ai Dapnu (101) kata Hk.L.Y (257,252) dap na pawnghpawm hpyen hpung ni hpe Man Mau hte Nyawng Htawk lapran kaw hkap gap ai kawn gasat gala majan byin ai lam chye lu ai.
Mungmyit Sinli Ga (Kachin Sub-state) KIA Masat (9) Dap Dung ginra hte Masat (2) Dap Dung ginra ni hta mung, May shata 8 ya shani Myen Hpyen Dap, Dapnu (99) kata na Myen hpyen hpung ni hte AA, MNDAA, TNLA hpyen hpung ni gasat gala majan byin ai lam na chye lu ai.
