KIA hte Myen hpyen ni gasat gala majan matut byin

KIA Dap Ba ( 2 ) Dap Dung ( 14 ) ginra hta shamu shamu shamawt htu lung wa ai Myen hpyen hpung hte KIA hpyen hpung ni, January 30 ya shani hkying 11:00am aten hta Chyasam hka mayan kaw gasat gala majan byin ai lam, shawnglam shisawk ni kawn chye lu ai.

Shana maga hkying 3:15pm aten hta mung, KIA Dap Dung ( 14 ) hpyen hpung hte Myen hpyen hpung ni Lapu hka kaw gasat gala majan byin ai, dai hpang hkying 9:00pm aten hta Chanta Kung, Dawi post kaw mung, gasat gala majan matut byin ai.

Mungmyit Sinli Ga ( Kachin Sub-State ) KIA Dap Ba ( 4 ) Dap Dung ( 8 ) ginra, Nam Hu mare makau kaw mung, January 30 ya shani hkying 1:30pm aten hta KIA Dap Dung ( 8 ) hpyen hpung hte Myen hpyen dap, Hk.L.Y ( 45, 241 ) na pawnghpawm dap ni gasat gala majan byin ai lam chye lu ai.