KIA hte Myen hpyen ni gasat gala majan matut byin
Ginjaw Ginra Ginwang Ginjaw, KIA Masat Dap Ba (5) Masat (3) Dap Dung ginra, Sadung Chihpwi lam numshe mile 13 kaw shara jahkrat nga ai Myen hpyen hte KIA ni April shata 17 ya jahpawt hkying 5:30am aten kaw nna gasat gala majan byin ai lam chye lu ai.
Ginjaw ginra, Bum Re kaw shara jahkrat nga ai Myen hpyen ni mung April shata 17 ya shani hkying 11:15am aten hta Munglai Hkyet maga 105mm laknak kaba hte 2 lang, Manam Dingsa Bum maga kalang bap bun ai.
Kagam kaw shara jahkrat nga ai Myen hpyen ni mung, KIA Masat (1) Dap Nawng Daju, Hpa Lap Bum, Lung Rawk Post hte Ja Hta maga 120mm laknak kaba hte 6 lang gap bun ai rai nna, Numlang kaw dap jung nga ai Hk.M.Y (438) dap ni mung Alaw Bum grup yin de, 105mm laknak kaba 5 lang gap bun ai lam chye lu ai.
KIA Masat (8) Dap Ba ginra, Nam Si Awng hte Maw Han lapran hta mung, dai hpawt hkying 7:40am aten hta Myen hpyen hte KIA ni gasat poi byin ai re.
Ya aten hta Myen Hpyen Dap ni gaw, KIA ni nga ai shara shagu de hpyen n gun law law hte shamu shamawt htu lung wa nga ai majaw, majan kaba byin wa na hpe mungshawa ni hkrit tsang nga ma ai hpe mung chye lu ai.
