KIA, KPDF pawm hpawm hpung ni ka-ni sun hkyen jasan ai lam galaw nga

KIA hte KPDF pawm hpawm hpyen hpung ni hku nna, Putao Ginwang, Lung Sha Yang mare makau hkan nga ai, ka-ni sun ni hpe hkyen jasan ai lam galaw nga ai hpe chye lu ai.

Lung Sha Yang mare sha n-ga, Tang Ja mare hte Masum Zup mare hkan nga ai ka-ni sun ni hpe lai wa sai February shata kaw nna, hkan hkyen jasan nga ai re lam chye lu ai.

Ya na zawn ka-ni sun hkyen jasan ai lam galaw ai hta ka-ni sun madu ni hte ka-ni lu sha ai mung mare masha ni hpe ningmu jahpaw hkaw tsun ai lam, ka-ni dawn kau ya ai lam ni galaw ai hpe chye lu ai.

February shata kaw nna ka-ni sun hkan hkyen jasan wa ai hta E-ka tsa kaba lu hkyen kau sai rai nna, lai wa sai 2017 ning hta mung nawku hpung pat jasan ni kawn, Lung Sha Yang mare hta ka-ni pat jasan bungli galaw lai wa sai lam chye lu ai.