KIA Masat (1) Dap Ba hte Masat (4) Dap Ba ginra ni hta gasat gala majan byin
KIA Masat (1) Dap Ba, Masat (7) Dap Dung ginra hte Mungmyit Sinli Ga (Kachin Sub-state) KIA Masat (4) Dap Ba, Masat (34) Dap Dung ginra ni hta February shata 23 ya shani gumshem Myen hpyen hte KIA ni gasat gala majan byin ai lam chye lu ai.
Masat (7) Dap Dung ginra, Mula Shidi kaw nna, Hpakma maga de hpyen modo hte yu wa ai gumshem Myen hpyen ni hpe dai na maga hkying 3 aten daram hta KIA hte PDF pawng hpawm hpyen hpung ni hkap shingla gasat dat ai kawn gasat poi byin ai lam, ginra masha ni kaw na chye lu ai.
Gasat gala majan a majaw, Lungsha Yang, Sumpyi Yang hte Ntsi Yang hkan na mungmare masha ni gaw, tinang shimlum ai myu mare kaba ni de makyin jinghku ni a dum nta hkan gan shingbyi nga ai hta aten galu na wa yang yakhkak lam ni law wa mai ai lam, buga masha ni tsun ai kawn chye lu ai.
KIA Masat (1) Dap Ba ginra de gumshem Myen hpyen ni hpyen n gun jat, shamu shamawt ding yang rai nga ai majaw, shani shagu ngu na gasat gala majan byin nga ai re.
Mungmyit Sinli Ga (Kachin Sub-state) KIA Masat (4) Dap Ba, Masat (34) ginra hta mung, February shata 23 ya jahpawt hkying 1:20am aten daram hta Nong Cho Budar Yung kaw shara jahkrat nga ai gumshem Myen hpyen dap hpe KIA, PDF pawng hpawm hpyen hpung ni sa htim gap gasat ai lam chye lu ai.
