KIA Masat (1) Dap Nawng Daju ginra de gumshem Myen hpyen ni matut htu lung wa
KIA Masat (1) Dap Nawng Daju, Masat (251) Dap Nawng Dap Dung ginra hta March shata 14 ya jahpawt hkying 7:50am aten, Nhkram kaw nna lung wa ai gumshem Myen hpyen hpung ni hpe KIA ni bawm hkap kapaw bun ai lam chye lu ai.
Gumshem Myen hpyen hpung ni hte arung arai htaw modo (1) hpe Kagam hte Shang Hkawng lapran kaw bawm hkap kapaw bun ai re lam chye lu ai.
Matut nna hkying 5:23pm hte 6:11pm aten laman, Wa Byen Bum kaw dap jung nga ai gumshem Myen hpyen dap ni Masat (1) Dap Nawng Daju, hpyen dap de 105mm hte (5) lang gap bun ai lam nga ai re.
March shata 13 ya shani hta mung gasat gala majan laja lana byin ai rai nna, Wa Byen Bum kawn 120mm (3) lang, Kagam Bum kawn 105mm (3) lang Masat (1) Dap Nawng Daju hpyen gap de gap bun ai hta laknak kaba si (1) mi Maga Yang hpyen yen dabang hte Miwa Gumsan mungdan U Ra mare lapran na Miwa Balik dap ni hka ja lu ai shara makau kaw wa hkrat ai lam chye lu ai.
KIA Masat (1) Dap Nawng Daju ginra de ya ten gumshem Myen hpyen hpung ni matut htu shadut lung wa ai sha n ga, gasat gala majan ni mung matut byin nga ai hte KIA Dap Ba, Dap Dung ginra shagu ngu na daram gasat gala majan byin taw nga ai hpe chye lu ai.
