KIA Masat (1) Dap Nawng Daju ginra hta gasat gala majan matut byin
KIA Masat (1) Dap Nawng Daju, Masat (253) Dap Nawng Dap Dung ginra kaw, July shata 26 ya shana maga hkying 3:20pm aten daram hta gumshem Myen hpyen dap ni hte KIA ni gasat gala majan matut byin ai lam chye lu ai.
Mali Yang mare maga na lung wa ai gumshem Myen hpyen n-gun (50) daram hpe KIA Masat (253) Dap Nawng Dap Dung na hpyen hpung ni, Ja Pu hte Mali Yang lapran kaw hkap gap gasat ai kawn gasat poi byin ai lam chye lu ai.
July shata 25 ya shani hta mung, Katsu Dabak de na hpyen garum sa wa ai gumshem Myen hpyen hpung ni hpe Masat (1) Dap Nawng Daju kata na pawng hpawm hpyen hpung ni, Sama lam numshe loi lai ai kaw hkap gap gasat dat ai re.
KIA Masat (5) Dap Ba, Masat (3) Dap Dung ginra hta mung, July shata 26 ya jahpawt daw hta Kampaiti maga na yu wa ai gumshem Myen hpyen dap ni hpe KIA ni Gaw Nan hte Lajawng mare lapran kaw, hkap gap gasat ai lam, shawnglam shiga lawk kaw na chye lu ai.
