KIA Masat (12) Dap Dung ginra hta gasat gala majan byin
KIA Masat (3) Dap Ba, Masat (12) Dap Dung ginra, Ban Bwe Gawng mare mayan kaw shamu shamawt du nga ai, gumshem Myen hpyen dap hpe August shata 22 ya jahpawt hkying 4:30am aten kaw nna hkying 9:45am aten du hkra, KIA hpyen hpung ni sa htim gap ai kawn gasat gala majan byin ai lam chye lu ai.
Gumshem Myen hpyen dap Hk.L.Y (121) hte Hk.M.Y (309) dap na pawng hpawm hpyen n gun (40) daram, KIA ni nga shara de tawt lai shang wa ai majaw gasat poi byin ai re lam chye lu ai.
Gasat poi byin ai hpang shani ka-ang 12:18pm aten hta gumshem Myen hpyen dap ni A-5 Jet nbungli langai hte Ban Bwe Gawng Mare hte Chyawk Htung Gyi grup yin hta bawm (9) lang wa jahkrat bun ai lam, shawng lam shiga lawk kaw na chye lu ai.
KIA Masat (2) Dap Ba, Masat (45) Dap Dung ginra hta mung, August shata 19 ya shani hta Dahkyet mare kaw nna nam lam hku, Hka Lung maga de chyinglau pru wa ai, gumshem Myen hpyen dap, Hk.L.Y (86) hte Hk.L.Y (238) dap na pawng hpawm n gun (70) daram hpe KIA ni bawm hte hkap adem gasat dat ai.
Bawm hte hkap gasat ai hta Myen hpyen la marai 2 si, marai marai 4 hkala ai lam nga ai, dai hkala ai marai 4 hpe modo kaji lahkawng hte Hka Lung mare kaw shara jahkrat nga ai, Hk.L.Y (260) post de htaw mat wa sai lam chye lu ai.
