KIA Masat (12) Dap Dung ginra hta gasat gala majan laja lana byin
KIA Masat (3) Dap Ba, Masat (12) Dap Dung ginra hta shamu shamawt chyinglau hkawm nga ai, gumshem Myen hpyen dap hte KIA, KPDF pawng hpawm hpyen hpung ni, March shata 30 ya jahpawt hkying 5:30am aten daram kaw nna, Tan Tada mare kaw laja lana gasat poi byin ai lam chye lu ai.
Gasat poi hta gumshem Myen hpyen maga si hkala machyi masha law ai majaw, Jet Fighter nbungli (2) hte Tan Tada mare kaw bawm wa jahkrat bun ai hta mungshawa marai (1) si sum nhtawm, nta langai hte mam dum langai mung wan hkru mat ai lam, ginra masha ni kawn chye lu ai.
March shata 29 ya shani hta mung, KIA Masat (12) Dap Dung ginra rai nga ai, Nat Lan, Nawng Let Gyi maga kawn htu shadut lung wa ai gumshem Myen hpyen dap, Hk.L.Y (10, 77 hte 88) dap na pawng hpawm hpyen n gun (150) daram hte KIA, KPDF pawng hpawm hpyen hpung ni, Si Moe Lay hte Nat Lan lapran kaw gasat poi byin ai re.
Jahpawt hkying 5:55am aten Si Moe Lay maga na shamu shamawt rawt wa ai, gumshem Myen hpyen n gun (30) jan hpe KIA, KPDF hpung ni bawm hte hkap shingla gasat dat ai lam nga ai. Dai hpang hkying 10:54am aten hta mung, Hk.L.Y (56) dap kawn rawt wa ai tai n gun (30) daram lawm ai modo langai hpe lawu lam mazup kaw KIA, KPDF ni hkap gap gasat ai lam chye lu ai.
