KIA Masat (12) Dap Dung ginra hta gasat gala majan matut byin
KIA Masat (3) Dap Ba, Masat (12) Dap Dung ginra, Nget Tada mayan hta gumshem Myen hpyen dap hte KIA, KPDF pawng hpyen hpung ni, March shata 24 ya jahkawt hkying 7:30am aten kaw na gasat gala majan matut byin ai lam chye lu ai.
Gumshem Myen hpyen dap, Hk.L.Y (10, 77) hte Hk.M.Y (602) dap na pawng hpawm hpyen n gun (130) jan gaw, Shwigu maga kaw na hpyen hpung (3) garan nhtawm, shamu shamawt rawt wa ai hpe KIA,KPDF pawng hpyen hpung ni hkap gap ai kawn gasat poi byin ai re lam chye lu ai.
Ndai gumshem Myen hpyen hpung ni hte sha, March shata 23 ya shani hta mung Nget Tada mayan kaw gasat poi byin ai re. Shana hkying 7:40pm aten e, Shwigu gumshem Myen hpyen dap Hk.L.Y (56) hpe KIA,KPDF pawng hpyen hpung ni sa htim gap gasat ai lam chye lu ai.
Gasat poi hta gumshem Myen hpyen maga si hkala machyi hkrum ai majaw, Nget Tada mare na mungshawa nta 2 hpe mung wan nat jahten kau ya ai sha n ga, makau gyup yin shara ni de sinat kani kaba hkrup mara gap shadam bun ai lam chye lu ai.
