KIA Masat (12) Dap Dung ginra kaw gasat gala majan laja lana byin ai hta gumshem Myen hpyen ni mare nat kau ya
KIA Masat (3) Dap Ba, Masat (12) Dap Dung ginra, Shwegu Ginwang, Na Lan mare kaw April shata praw 5 ya jahpawt hkying 9:30am aten kaw nna, gumshem Myen hpyen dap hte KIA, KPDF pawng hpawm hpung ni laja lana gasat gala majan byin ai lam chye lu ai.
Gasat poi byin ai kaw gumshem Myen hpyen maga si hkala law ai majaw, gumshem Myen hpyen dap ni gaw, Man Wing mare hte Shwemaw Lay mare lahkawng hpe wan nat jahten kau ai hta hpunggyi jawng mung hkru lawm mat ai lam, ginra masha ni kawn chye lu ai.
Ndai zawn gasat gala majan laja lana byin nga ai majaw, Si Tawng, Si Ta, Man Wing, Si Mu Gyi, Si Mu Lay hte Na Lan mare hkan na mungshawa ni gaw, tinang shim dum ai shara de hprawng koi yen nga ai lam chye lu ai.
Tada U kawn rawt wa ai Jet Fighter hte mung, Si Ta mare grup yin shara ni hta bawm numdaw 3 lang wa jahkrat bun ai lam chye lu ai.
KIA Masat (12) Dap Dung ginra hta March shata 23 ya shani kaw nna, gumshem Myen hpyen dap ni shamu shamawt chyinglau shang wa ai majaw, shani shagu ngu na gasat poi byin nga re.
Ya mung hpyen masa naw shaja hkat nga ding yang rai nna, gumshem Myen hpyen dap pawng hpawm hpyen n gun 700 daram re lam, ginra shi sawk ni shana wa ai kaw na chye lu ai.
