KIA Masat (15) Dap Dung ginra de, gumshem Myen hpyen ni htu lung wa ai majaw gasat gala majan byin
KIA Masat (3) Dap Ba, Masat (15) Dap Dung ginra de, gumshem Myen hpyen ni htu shadut lung wa ai majaw, October shata 22 ya jahpawt hkying 8:00am aten hta Lung Ja Bum lagaw kaw KIA hpyen hpung ni hte gasat gala majan byin ai lam chye lu ai.
Gumshem Myen hpyen dap, Dapnu (Tatma-88), Hk.L.Y (237) dap hte Hk.M.Y (437) pawng hpawm hpyen n gun (100) daram gaw, KIA ni shara la nga ai Lung Ja Bum de htu shang wa ai majaw, KIA ni hkap shingla gasat dat ai kaw nna, gasat poi byin ai re lam, lit nga ai salang ni tsun ai kaw na chye lu ai.
Gasat poi gaw jahpawt hkying 8:00am kaw nna minute 30 daram lahkawng maga gap gasat hkat ai lam byin nhtawm, shani ka-ang hkying 12:00non aten kaw nna bai ngoi hpang ai gaw, shana daw hkying 5:00pm aten daram du hkra sinat nsen ni bai na lu ai, nga nna Manje buga masha langai tsun dan ai.
Shana maga hkying 3:00pm aten hta Lung Ja Bum mayan kaw, gumshem Myen hpyen Jet Fighter nbungli hte bawm wa jahkrat bun ai lam mung nga ai sha n ga, Hka Wan Bang kaw nga ai gumshem Myen hpyen ni hte Nmawk kaw dap jung ai Hk.L.Y (237) dap ni laknak kaba gap bun ai lam chye lu ai.
