KIA Masat (15) Dap Dung ginra hte Masat (27) Dap Dung ginra hta gasat gala majan byin
KIA Masat (15) Dap Dung ginra hte Masat (27) Dap Dung ginra hta gumshem Myen hpyen dap hte KIA ni February shata 17 ya shani hta gasat gala majan byin ai lam chye lu ai.
KIA Masat (15) Dap Dung ginra rai nga ai, Wa Wang Mare Lung Ja Bum lawu kaw dai hpawt hkying 10:46am aten hta numdaw mi, hkying 11:30am aten hta numdaw lahkawng lang gasat poi byin ai nga nna, shawng lam na lit nga ai salang langai tsun ai.
Gasat poi byin ngut ai hpang shani ka-ang hkying 12 grup yin hta helicopter nbung li (1) majan byin ai shara lahta kaw du hkra wa pyen gawai nna, bai nhtang yu mat wa ai, gap ai lam gaw nnga ai, lam salang wa matut tsun ai.
KIA Masat (27) Dap Dung ginra hta mung, February shata 17 ya jahpawt hkying 9:00am aten hta Loi Jawm maga na yu wa ai gumshem Myen hpyen dap Hk.L.Y (223) dap na hpyen n gun (100) daram hte Buduzar (1) lawm ai hpyen hpung ni hpe KIA ni Dunghkung Hkyet kaw bawm gap hkap bun ai lam chye lu ai.
