KIA Masat (15) Dap Dung ginra hte Masat (36) Dap Dung ginra ni hta gasat gala majan byin

KIA Masat (3) Dap Ba, Masat (15) Dap Dung ginra hte Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra ni hta October shata 24 ya shani gumshem Myen hpyen dap hte KIA ni gasat gala majan byin ai lam chye lu ai.

KIA Masat (15) Dap Dung ginra, Lung Ja Bum mayan hta October shata 24 ya jahpawt hkying 5:45am aten hta gumshem Myen hpyen dap ni Jet nbungli hte bawm lahkawng lang wa jahkrat bun ai lam nga ai.

Dai hpang hkying 10:40am aten hta numdaw kalang bai Jet nbungli (3) hte bawm (5) bai wa jahkrat bun ai lam, shawng lam na lit nga ai salang ni kaw na chye lu ai.

KIA Masat (15) Dap Dung ginra, Lung Ja Bum mayan hta October shata 22 ya shani kaw nna, gumshem Myen hpyen ni htu shadut lung wa ai majaw, KIA hte gasat gala majan byin ai re.

Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra, Huwa Bum hta mung, October shata 24 ya shana maga hkying 4:20pm aten kaw nna, hkying 4:50pm aten du hkra, gumshem Myen hpyen dap hte KIA ni gasat gala majan byin ai lam chye lu ai.

“Myen hpyen dap gaw, Hk.M.Y (355) re ngu shiga na lu ai, n gun gaw (60) daram re ngu mara lu ai. Anhte kaw na ni nga ai, Huwa Bum de htu shadut lung wa ai majaw, KIA ni hkap shingla gasat dat ai kaw na minute 30 daram gasat poi byin ai” nga nna lit nga ai salang langai tsun ai.

Ya aten KIA Masat (36) Dap Dung ginra ni hta gumshem Myen hpyen dap ni mi nga ai hte ya bai shamu shamawt htu lung wa ai hpyen n gun yawng (200) jan daram nga ai, Myen hpyen ni htingnut mat ai lam nnga yang, gasat poi matut byin wa mai ai lam, salang wa tsun ai kaw na chye lu ai.