KIA Masat (36) Dap Dung ginra hta gasat gala majan matut byin
Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra, Huwa Bum hte Namhkawng Bum kaw, October shata 25 ya shani gumshem Myen hpyen dap hte KIA ni gasat gala majan matut byin ai lam chye lu ai.
“Dai hpawt hkying 7:12am aten kaw na 8:00am aten du hkra gaw, mani byin ai Huwa Bum kaw gap hkat ai. Dai na maga hkying 3:15pm aten kaw nna hkying 3:50pm aten du hkra gaw, Namhkawng Bum kaw gasat poi byin ai” re lam shawng lam na lit nga ai salang wa tsun ai.
Gumshem Myen hpyen dap gaw, Dapnu (99), Hk.M.Y (574) hte Hk.M.Y (355) dap na pawng hpawm hpyen hpung ni rai nna, KIA ni shara la nga ai de htu shadut lung wa ai majaw, gasat poi byin wa ai re lam, salang wa tsun ai.
Gasat poi byin ai shara de, Mai Hpang mare kaw shara la nga ai gumshem Myen hpyen dap hte mile 105 kaw na gumshem Myen hpyen ni sinat kaba hte gap bun ai lam chye lu ai.
Dai na hkying 7:17pm aten daram hta gaw KIA ni, Mai Hpang mare gumshem Myen dap, Mungbaw gat pa ntsa, Pyi Tu Tsit kawng kaw nga ai Myen hpyen hte Bangsai kaw dap jung ai gumshem Myen dap hpe aten langai hta sha sa htim gap gasat ai lam na chye lu ai.
Mai Hpang kaw na gumshem Myen hpyen ni sinat kaba hkrup mara gap shadam dat ai hta, Mungbaw gat pa kaw myawk si wa hkrat kapaw ai majaw, mungmasha La langai hte Num marai lahkawng pala hkyep hkra hkala ai lam, buga masha ni tsun ai.
Hkala hkrum ai hta Salang Lamai Naw San gaw, lagaw sinda hte baw kaw loi dingzet hkra ai, Jan. Tangbau Dai Nan gaw baw kaw dingtset hkra nhtawm, jawng saranum Jaugawng Bawk San gaw, kan kaw hkra ai majaw loi tsang ra ai lam chye lu ai.
Salang Lamai Naw San gaw, tinang a nta kaw tsi tsi hkamla nga nhtawm, saranum yan mung, Mungbaw kaw sha tsi tsi hkamla nga ai lam, buga masha ni tsun ai.
