KIA Masat (2) Dap Ba ginra kata KIA hte Gumshem Myen hpyen dap ni gasat gala matut byin
KIA Masat (2) Dap Ba, Masat (20) Dap Nawng Dap Dung ginra, Dum Bung kaw nna hpyen shamu shamawt lung wa ai Gumshem Myen hpyen hpung ni hte KIA hpyen hpung ni September shata 25 ya jahpawt hkying 7:00am aten hta Dum Bung Hka hte Sai Ling Hka mazup makau kaw hkap shingla gasat poi byin ai lam chye lu ai.
Dum Bung maga kaw nna hpyen shamu shamawt lung wa ai Gumshem Myen hpyen n-gun (100) jan hpung ni hpe hkap gap gasat ai, Gumshem Myen hpyen ni kawn grup yin de sinat kaji kaba gap ai re lam, dai ginra na lit nga ai salang ni kaw na chye lu ai.
Dai Gumshem Myen hpyen hpung ni kawn shana maga hkying 1:00pm aten hta, Lawa Na Yang Pa kaw wa du nna Gum Di hkaraw maga de sinat kaba (3) lang gap bun ai lam chye lu ai.
Lai wa sai September shata 23 ya shani hta mung, KIA Masat (2) Dap Ba, Masat (11) Dap Dung ginra, Makawk Zup kawn lagaw lam shamu shamawt lung wa ai Gumshem Myen hpyen n-gun (80) daram hpung ni hte KIA hpyen hpung ni gasat poi byin ai lam nga ai.
Danai Lido lam mayan de Gumshem Myen hpyen dap ni kawn hpyen shamu shamawt ai lam dingyang galaw nga ai majaw, KIA hte Gumshem Myen hpyen dap ni gasat gala jahkring hkring byin nga ai re.
September shata 25 ya shani hkying 11:30am aten hta mung, Mungmyit Sinli Ga (Kachin Sub-state) ginra, Man Jak mare ntsa kaw Kokang MNDAA ni hte Gumshem Myen hpyen dap ni gasat poi byin ai rai nna, Naw Gu Gumshem Myen hpyen dap kawn Loi Jung Bum maga de sinat kaba gap bun ai lam, dai ginra na lit nga ai salang ni tsun ai kaw na chye lu ai.
