KIA Masat (2) Dap Ba ginra kata KIA ni hte Gumshem Myen hpyen dap ni gasat majan matut byin
KIA Masat (2) Dap Ba, Masat (20) Dap Dung ginra, Lahkra Yang mare dingsa hte Kumtsai Yang mare lapran kaw October praw (9) ya jahpawt hkying 9:15am aten hta, KIA hpyen hpung ni hte Gumshem Myen hpyen dap ni gasat gala majan byin ai lam chye lu ai.
“Dum Bang kawn hpyen shamu shamawt pru wa ai Gumshem Myen hpyen dap, Hk.M.Y (388) hte (389) dap na pawng hpawm hpyen n-gun (100) daram hpung ni hpe KIA hpyen hpung ni hkap gap ai kawn minutes (15) daram gasat poi byin ai lam, shawng lam na lit nga ai Salang ni shana wa ai.
October shata praw (8) ya shani hta mung, KIA Masat (2) Dap Ba ginra hta hpyen shamu shamawt hkawm nga ai Gumshem Myen hpyen hpung ni hpe Nawngmi mare hte Nawngmi mare dingsa lapran kaw kalang, Daw Lawng Kawng kaw kalang, Man Pang mare hte Darung mare lapran kaw kalang, shara (3) kaw KIA hpyen hpung ni hkap gap ai kawn gasat gala majan byin ai lam chye lu ai.
KIA Masat (2) Dap Ba ginra de Gumshem Myen hpyen dap ni kawn Danai Lido lam hku nna, ndai laman hpyen n-gun, laknak arung arai ni htaw shalai ai lam galaw nga ai sha n-ga, lagaw lam hku nna mung hpyen shamu shamawt ai lam matut manoi galaw nga ai majaw, KIA hpyen hpung ni kawn hkap shingla gap gasat ai lam galaw nga ai re.
Ya na zawn Gumshem Myen hpyen dap ni, hpyen shamu shamawt hkawm ai kaw KIA hpyen hpung ni hkap gap gasat ai lam galaw nga ai raiyang, Lido lam mayan shanu nga ai mare kahtawng ni hpe dingbai dingna jaw ai lam galaw na re ngu Gumshem Myen hpyen dap kawn, mung mare masha ni hpe tsun jahkrit ai lam ni mung nga ai nga nna, ginra masha ni tsun dan ai kaw na chye lu ai.
October shata praw (8) ya shani hta mung, hkying 12:00pm aten hta Gumshem Myen hpyen hpung ni kawn sinat kaji kaba gap let, Lido lam mayan na Man Pang mare hpe lai di ai majaw, mare kata na dum n-ta (2) hte sasana n-ta (1) hten za hkrum mat ai sha n-ga, mung mare masha ni hkrit tsang nna nawku jawng hkan gan koi yen shingbyi nga ai lam, ginra masha ni tsun shana wa ai kaw na chye lu ai.
