KIA Masat (2) Dap Ba ginra kata shara (2) kaw KIA hte Gumshem Myen hpyen dap ni gasat poi byin
KIA Masat (2) Dap Ba, Masat (43) Dap Dung ginra, Nam Hpyek hte Kawng Ra mare lapran Yuzana lam masat (40) kaw Hk.M.Y (390) dap kawn lagaw lam hte hpyen shamu shamawt pru wa ai Gumshem Myen hpyen hpung ni hpe October shata praw (4) ya jahpawt hkying 8:40am aten hta KIA hpyen hpung ni hkap gap ai kawn gasat poi byin ai lam chye lu ai.
Gumshem Myen hpyen dap, Hk.M.Y (390) dap kaw na hpyen n-gun (70) daram hpung ni gaw, KIA ni nga ai ginra de hpyen shamu shamawt shang wa ai majaw, KIA hpyen hpung ni hkap shingla gasat dat ai kawn minutes (20) daram gasat poi byin ai re lam chye lu ai.
Shani hkying 10:30am aten hta mung, Gumshem Myen hpyen dap, Hk.L.Y (297) dap kaw na pru wa ai Hk.M.Y (389) hpyen hpung ngu maram lu ai hpyen n-gun (100) daram hpung ni hpe Hkawng Law Hka hte Jam Bu Bum lapran kaw KIA hpyen hpung ni hkap shingla gasat dat ai kawn minutes (15) daram gasat poi byin ai lam, shawng lam na lit nga ai salang ni shana wa ai.
KIA Masat (2) Dap Ba ginra, Danai Lido lam mayan de Gumshem Myen hpyen dap ni kawn ndai laman hpyen shamu shamawt ai lam nhkring nsa galaw nga ai majaw, KIA hpyen hpung ni hte shani shagu ngu na gasat poi byin nga ai lam chye lu ai.
