KIA Masat (2) Dap Ba hte Masat (6) Dap Ba ginra ni hta gasat gala majan byin

KIA Masat (2) Dap Ba, Masat (20) Dap Dung ginra hte Mungmyit Sinli Ga, Kachin Sub-state KIA Masat (6) Dap Ba, Masat (36) Dap Dung ginra ni hta gumshem Myen hpyen dap hte KIA ni gasat gala majan byin ai lam chye lu ai.

Kamaing Shin Bum lam hku nna, shamu shamawt shang wa ai gumshem Myen hpyen dap Hk.L.Y (238) dap na hpyen n gun (60) daram hpung ni hpe Masat (20) Dap Dung hpyen hpung ni April shata praw 4 ya shana daw hkying 1:10pm aten hta La Gawng mare baw kaw bawm hte hkap gap gasat dat ai lam chye lu ai.

Gasat gala majan byin ai hta gumshem Myen hpyen maga na si hkala hkrum ai majaw, mungmasha ni nga ai mare grup yin shara ni de sinat kaba hkrup mara gap shadam bun ai lam nga ai.

Mungmyit Sinli Ga, Kachin Sub-state, KIA Masat (6) Dap Ba, Masat (36) Dap Dung ginra, Mungbaw Howa Bum mayan hta mung, April shata praw 3 ya shani gumshem Myen hpyen hpung n gun (70) jan hpe KIA ni sinat kaba hte hkap gap gasat dat ai lam chye lu ai.

Mungbaw Hugan mare ntsa kaw mung, April shata praw 3 ya shani hta sha Kokang MNDAA hte gumshem Myen hpyen ni gasat poi byin ai lam matut chye lu ai.