KIA Masat (2) Dap Ba, Masat (4) Dap Ba hte Masat (5) Dap Ba ginra hta gasat gala majan byin
KIA Masat (2) Dap Ba, Masat (4) Dap Ba hte Masat (5) Dap Ba ginra hta July shata praw 8 ya shani shara 3 kaw gasat gala majan byin ai lam chye lu ai.
KIA Masat (2) Dap Ba ginra, Danai Lido lam, Jahtu Zup mare kaw dap jung shara jahkrat nga ai gumshem Myen hpyen dap n pu na Min Zin Thant woi awn ai P.T.Ts dap hpe KIA hpyen hpung ni sa htim gasat ai lam, ginra shiga lawk kaw na chye lu ai.
Ndai gasat gala majan byin ai hta mungshawa nkau hta hkala hkrum ai lam nga ai raitim, marai gade re hpe tup hkrak nchye lu shi ai re. Lahkawng maga si hkala hkrum ai lam nga ai raitim, gade ram si hkala hkrum ai hpe tup hkrak nchye lu shi ai re.
Mungmyit Sinli Ga (Kachin Sub-State), KIA Masat (4) Dap Ba ginra hta July shata praw 8 jahpawt hkying 10:00am aten hta Sinli maga na lung wa ai Dapnu (99) na hpyen hpung ni hpe KIA ni Punghtun, Man Pin hte Pa Ju mare lapran kaw KIA ni hkap shingla gasat ai kawn gasat poi byin ai lam chye lu ai.
Ginjaw Ginra, KIA Masat (5) Dap Ba ginra hta mung, Nam San Yang hpyen man de hpyen n-gun garum lung wa ai Myen hpyen hpung ni hpe KIA hpyen hpung ni Hka La kadawng lai Bum Sawn bum mayan kaw, KIA hpyen hpung ni hkap shigla gasat dat ai lam, ginra shisawk ni kaw na chye lu ai.
Gumshem Myen hpyen dap maga machyi masha law ai majaw, Dawhpum Yang makau Hkang Kai bum kaw shara jahkrat nga ai gumshem Myen hpyen dap ni kawn Laiza grup yin de laknak kaba 4 lang gap bun ai sha n-ga Hpun Pyen bum hte Bumre bum kaw nga ai gumshem Myen hpyen dap ni mung, sinat kaba hkrup mara gap shadam bun ai lam chye lu ai.
July shata praw 7 ya shani hta mung, Manmaw maga na lung wa ai gumshem Myen hpyen dap Tatma (88) kata na hpyen n-gun (90) daram gaw, leng (12) kap ai modo 2 kaw nkau gaw jawn nna, nkau gaw lagaw lam lung wa ai hpyen hpung ni hpe KIA hpyen hpugn ni Num lang mare hte Dawhpum Yang lapran Loi Jaw kadawng kaw, hkap shingla gasat dat ai lam, shawng lam shisawk ni kaw na chye lu ai.
Ya aten Ginjaw Ginra mayan hta gumshem Myen hpyen dap ni hpyen n-gun matut manoi jat nga dingyang rai nna, lahkawng maga hpyen masa shaja hkat nga ding yang re majaw, gasat gala majan laja lana byin wa na hpe, mungshawa ni hkrit tsang nga ma ai re.
Dai na hkying 8:40pm aten hta Nam San Yang hpyen man maga de gumshem Myen hpyen dap ni Jet Fighter bungli hte bawm 2 lang wa jahkrat da nna bai nhtang mat wa ai lam, shawnglam shiga lawk kaw na chye lu ai.
၎
င
၎
၎
