KIA Masat (2) Dap Ba, Masat (4) Dap Ba hte Masat (5) Dap Ba ginra ni hta gasat gala majan byin
KIA Masat (5) Dap Ba, Masat (3) Dap Dung ginra, Law Sa Mare kaw shamu shamawt du nga ai, gumshem Myen hpyen dap Hk.M.Y (319) hte Hk.L.Y (142) dap na pawng hpawm hpyen n gun (80) daram gaw, Sani Hku maga hku lagaw lam hte pru wa ai hpe September shata praw 7 ya jahpawt hkying 6:00am aten hta KIA ni gap gasat ai lam chye lu ai.
KIA Masat (2) Dap Ba, Masat (14) Dap Dung ginra de, shamu shamawt htu lung wa ai, Myen hpyen dap, Dapnu (88) kata na Hk.L.Y (103), Ts.K.Hk (21) kata na Hk.L.Y (142) hte Shwe Min Pyi Tu Tsit pawng hpawm hpyen n gun (100) daram hpung ni Danai Lido lam ding yang lung wa ai hpe September shata praw 7 ya jahpawt hkying 7:00am aten hta KIA ni bawm hte hkap gap gasat ai hta tai hpyen maga na marai (12) hkala mat ai lam, shawng lam shiga lawk kaw na chye lu ai.
Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra hta mung, September shata praw 8 dai hpawt hkying 8:20am aten kaw nna hkying 8:50am aten du hkra, Myen hpyen hpung ni hpe KIA ni Sun Lung hte Yawng Bang mare lapran kaw hkap gap gasat ai lam chye lu ai.
KIA Dap Dung (9) ginra kaw, September shata praw 6 ya shani kaw nna, gumshem Myen hpyen dap, Dapnu (77) hte Dapnu (99) kata na pawng hpawm hpyen hpung ni shamu shamawt chyinglau shang wa ai majaw gasat poi (3) ya byin sai re.
Gumshem Myen hpyen dap, Dapnu (77) ngu na lu ai hpyen hpung ni gaw, September shata praw 6 ya shani hta Sinli Dap kaw hpyen modo (50) hta hpyen n gun, laknak machyu pala hte malu masha htaw nna du shang nga ai sai rai nna, ndai modo ni gaw Muse maga de lung wa na matu lam ding yang shimlam la ya nga ai lam, ginra shi sawk ni kaw na chye lu ai.
KIA Masat (6) Dap Ba ginra hta shani shagu ngu na gasat gala majan byin nga ai hta gumshem Myen hpyen ni ndai zawn hpyen n gun law law hte bai htu lung wa ai majaw, gasat gala majan gaw grau nna laja lana byin wa na kun nga nna, buga masha ni myit tsang nga ai lam chye lu ai.
