KIA Masat (2) Dap Ba, Masat (6) Dap Ba hte Masat (8) Dap Ba ginra ni hta gasat gala majan byin
KIA Masat (2) Dap Ba, Masat (11) Dap Dung ginra, Gatshang Yang hte Mayan mare lapran na deng (21) pawng hpawm shagyit (Gate) hte dai makau na gumshem Myen hpyen dap hpe March shata 19 ya jahpawt manap hkying 4:00Am aten hta KIA, PDF pawng hpawm hpyen hpung ni sa htim gap gasat ai lam chye lu ai.
Dai pawng hpawm shagyit hta lai wa/sa mungshawa ni hpe gumshem Myen hpyen ni sawk jep shatsang ai shagyit re. Shagyit makau kaw dap jung nga ai Hk.L.Y (260) dap hpe mung gap gasat ai lam nga ai.
Deng (21) shagyit hpe wan nat jahten kau ya ai hpang, gumshem Myen hpyen dap ni Helicopter (2) hte gasat gala majan byin ai shara makau hkan wa gayin gap ai lam, buga masha ni kaw na chye lu ai.
Mungmyit Sinli Ga (Kachin Sub-state), KIA Masat (6) Dap Ba, Masat (36) Dap Dung ginra, Mankang hte Sama mare lapran na Gamtsaw Kawng mayan kaw March shata (19) ya jahpawt hkying 8:55Am aten kaw na hkying 9:20Am aten du hkra, gumshem Myen Hpyen Dap Hk.M.Y (420) dap na hpyen hpung ni hte KIA ni gasat poi byin ai lam, shawng lam na lit nga ai salang langai tsun ai.
Gumshem Myen hpyen n gun 60 daram anhte ni nga ai maga htu lung wa ai majaw gasat poi byin ai rai nga ai, matut na gasat poi naw byin wa mai ai lam, salang wa matut tsun ai.
KIA Masat (8) Dap Ba, Masat (5) Dap Dung ginra hta mung, March shata 19 ya shani Hupin mare hte kade ntsan ai Nam Myen mare makau kaw gumshem Myen hpyen ni hte KIA hpyen hpung ni gasat poi byin ai lam, ginra shiga lawk kaw na chye lu ai.
